ھىجرىيە: | مىلادىي: 18 Ekim 2019

چىكىنىڭ
سۈرىيەدە ئەسىرگە چۈشۈپ قالغان ھەمشىرىلەر ھەققىدە شەرقى تۈركىستان ئۆلىمالار بىرلىكىنىڭ باياناتى

سۈرىيەدە ئەسىرگە چۈشۈپ قالغان ھەمشىرىلەر ھەققىدە شەرقى تۈركىستان ئۆلىمالار بىرلىكىنىڭ باياناتى

شەرقى تۈركىستان ئۆلىمالار بىرلىكى 2016- يىلى قۇرۇلغاندىن بىرى ۋەتەن ئىچى ۋە سىرتىدىكى شەرقى تۈركىستان خەلقىنىڭ ئىشلىرىغا كۆڭۈل بۆلۈپ كەلمەكتە، مىللىتىمىزنىڭ مەسىلىلىرىنى ھەل قىلىش يولىدا ئىمكانىيىتىنىڭ يېتىشىچە تىرىشماقتا. شەرقى تۈركىستاندىكى مۇسۇلمانلارنىڭ دەرد ئەلەملىرىنى ئىسلام دۇنياسىغا ئاڭلىتىش ئۈچۈن تىرىشىپ كەلمەكتە. مىللىتىمىز ۋە ئانا ۋەتىنىمىز شەرقىي تۈركىستان دەۋاسى ئۈچۈن ھەر تۈرلۈك ساھەلەردە خىزمەت ئېلىپ بارماقتا، خەلقىمىزنى ئاشقۇنلۇق ۋە پاسسىپلىقتىن خالىي توغرا يولغا يېتەكلەش ئۈچۈن ھەرىكەت قىلماقتا.

 شەرقى تۈركىستان ئۆلىمالار بىرلىكى چەتئەلدىكى مۇتلەق كۆپ ساندىكى ئۆلىمالارنى ئۆز ئىچىگە ئالغان تەشكىلات بولۇش سۈپىتى بىلەن مىللىتىمىزنىڭ تىلى، ئۈمىدى ۋە يېتەكچىسىدۇر. ئۆلىمالار بىرلىكى مىللىتىمىزگە توغرا يول كۆرسىتىش، مەسلىھەت بېرىش، خاتا ئېقىملاردىن ئاگاھلاندۇرۇش، مىللەتنى پرىنسىپال نۇقتىلاردا بىرلەشتۈرۈش، تارماق مەسىلىلەردە بىر- بىرىگە يول قويۇش ئاساسىدا ھەمكارلىشىش مەيدانىنى ھازىرلاش ئۈچۈن يېتەكچىلىك رول ئوينايدۇ.

بىر قانچە ئاي ئىلگىرى سۈرىيەدە ئەسىرگە چۈشۈپ قالغان بىر بۆلۈك ھەمشىرىلىرىمىز ۋە بالىلار توغرىسىدىكى خەۋەرگە بىئارام بولغان بىرلىك ئەزالىرى، ئۇلارنىڭ خىتايغا قايتۇرۇلۇش ئېھتىماللىقى توغرىسىدىكى خەۋەر تارقالغاندىن كېيىن، كۆڭلى تېخىمۇ غەم قايغۇغا چۆمدى. خەلقىمىزگە مەلۇم بولغىنىدەك، شەرقى تۈركىستان ئۆلىمالار بىرلىكىنىڭ بۇنىڭغا ئوخشاش خەلقئارالىق سىياسىي مەسىلىنى ھەل قىلىشتىكى ئىمكانىيىتى چەكلىك بولسىمۇ، يەنىلا بۇ مەسىلىدە باشقا قېرىنداش تەشكىلاتلار بىلەن ھەمكارلىشىپ كۈچىنىڭ يېتىشىچە تىرىشماقتا.

ئۆلىمالار بىرلىكى پەيغەمبەر ئەلەيھىسسالامنىڭ: »قايسى بىر كىشى بىر مۇسۇلماننىڭ قىيىنچىلىقىنى ھەل قىلىپ قويسا، ئاللاھ ئۇنىڭ قىيىنچىلىقىنى قىيامەت كۈنى كۆتۈرۈۋېتىدۇ« دېگەن ھەدىسىگە ئاساسەن، دۇنيانىڭ قايسى بىر يېرىدە بىرەر شەرقى تۈركىستانلىقنىڭ قىيىنچىلىقى بولسا، ئۇنى ئۆزىنىڭ قىيىنچىلىقى دەپ قارايدۇ.

شۇنىڭ بىلەن بىرلىكتە، مۇھاجىرەتتىكى قېرىنداشلىرىمىزنى شەرقى تۈركىستاندىكى خەلقىمىزنىڭ ئورۇنسىز تۆھمەتلەرگە قېلىشىغا سەۋەب بولىدىغان ھەر قانداق ئىشلاردىن يىراق تۇرۇشىغا چاقىرىدۇ ۋە مىللەتنىڭ مەنپەئەتىگە ئېنىق زىيان ئېلىپ كېلىدىغان پىكىرلەردىن ۋە خاتا ئورۇنلاردا تۇرۇپ قېلىشتىن ئاگاھلاندۇرىدۇ.

     ھۆرمەت بىلەن:          

                         شەرقى تۈركىستان ئۆلىمالار بىرلىكى

خەۋەرلەر

باشقا خىزمەتلەر