ھىجرىيە: | مىلادىي: 30 Ekim 2020

چىكىنىڭ
ئابدۇلھەكىم مەخسۇم ھاجىم ئوغلى ئابدۇقەييۇم ھاجىم خىتاي زىندانلىرىدا شېھىد قىلىندى

ئابدۇلھەكىم مەخسۇم ھاجىم ئوغلى ئابدۇقەييۇم ھاجىم خىتاي زىندانلىرىدا شېھىد قىلىندى

ئابدۇقەييۇم ھاجىم 1957 – يىلى گۇماناھىيىسىدە مۇجاھىد، ئۆلىما، ئۇستاز ئابدۇلھەكىم مەخسۇم ھاجىم ئائىلىسىدە دۇنياغا كەلگەن، ئىككى ياش ۋاقتىدا يەنى 1959- يىلى دادىسى ئابدۇلھەكىم مەخسۇم ھاجىم خىتاي ھاكىمىيىتى تەرەپىدىن تۇتقۇن قىلىنىپ 20 يىللىق قاماق جازاسىغا ھۆكۈم قىلىنغان.

ئابدۇقەييۇم ھاجىمنىڭ دادىسى خىتاي زىندانلىرىدا ھەرتۈرلۈك خورلۇق ۋە زۇلۇم تارتقان بولسا ئابدۇقەييۇم ھاجىم، ئانىسى ۋە ئىككى  ئاچىسى بىلەن جەمىيەتتە خىتاي ھاكىمىيىتىنىڭ ئىنساننىڭ خىيالىغىمۇ كىرىپ چىقمايدىغان ھەرتۈرلۈك جىسمانى ۋە رۇھى جەھەتلەردىن خورلۇشىغا ئۇچراش بىلەن بىرگە پەننىي ۋە دىنىي بىلىملەردە ئوقۇپ، تەربىيەلىنىشتىن مەھرۇم قالغان. دادىسى ئۇستاز  ئابدۇلھەكىم مەخسۇم ھاجىم قاماقتىن بوشاپ جەمئىيەتكە چىققاندىن كېيىن، 1979- يىلىدىن  باشلاپ  تاكى ۋاپات قىلغانغا قەدەر يېشى بىر ئاز چوڭىيىپ قالغان بولسىمۇ ۋاقىتنى قولدىن بەرمەي  دادىسىدىن تەلىم - تەربىيە ئېلىپ خىلى يېتىشكەن ئۆلىما بولۇپ  قالغان. دادىسى ئابدۇلھەكىم مەخسۇم ھاجىم تۇيۇقسىز ۋاپات بولۇپ كەتكەندىن كېيىن ئىزچىل دادىسىنىڭ خىزمەتلىرىگە ۋارىسلىق قىلىپ قولىدىن كېلىشىچە قاغىلىق خەلقىنىڭ دىنىي خىزمەتلىرىگە يىتەكچىلىك قىلىپ كەلگەن.

ئابدۇقەييۇم ھاجىم 2017 - يىلى  ئائىلە بويىچە خىتاي ھاكىمىيىتى تەرەپىدىن تۇتقۇن قېلىنىغان ھەمدە ئۆيلىرى ۋە ئۆيىنىڭ ئۇدۇلىدىكى ئۇستاز ئابدۇلھەكىم مەخسۇم ھاجىم باشچىلىقىدا سېلىنغان مەسچىت  چېقىپ تۈزلىۋىتىلگەن.

ئىشەنجىلىك مەلۇماتلارغا ئاساسلانغاندا ئابدۇقەييۇم ھاجىمنىڭ 2020 - يىلى 8 - ئايلاردا تۈرمىدە شېھىت بولۇپ كەتكەنلىكى مەلۇم.

ئابدۇقەييۇم ھاجىمنىڭ بوۋىسى ئابدۇلجەلىل داموللا ھاجىممۇ  1937 - يىلى جاللات شىڭشىسەي تەرىپىدىن تۇتقۇن قېلىنىپ، بىر تۈركۈم ۋەتەنپەرۋەرلىرىمىز بىلەن بىرگە بوغۇپ ئۆلتۈرىۋىتىلگەن. دادىسى ئۇستاز ئابدۇلھەكىم مەخسۇم ھاجىممۇ 1936- يىلىدىن 1937- يىلىغىچە ئىككى يىل ( دادىسى بىلەن بىرگە)، 1947- يىلىدىن 1948- يىلىغىچە ئىككى يىل، 1954- يىلىدىن 1956- يىلىغىچە ئىككى يىل، 1959- يىلىدىن 1979- يىلىغىچە 20 يىل بولۇپ جەمئىي 26 يىل دىنى، ۋەتىنى ئۈچۈن خىتاي زىندانلىرىدا ياتقان.

ئابدۇلھەكىم مەخسۇم ھاجىم 1979 - يىلىدىن 1993 - يىلى ۋاپات بولۇپ كەتكىچە (خىتاي ھاكىمىيىتى تەرىپىدىن سۈيقەست بىلەن ئۆلتۈرۈلگەن دىگەن گۇمان بار) بولغان قىسقىغىنە 14 يىللىق ھاياتىدا خىتاي ھاكىمىيىتىنىڭ ئىزچىل نازارىتى، پاراكەندىچىلىكى ۋە تەقىبى ئاستىدىمۇ كېچىنى كۈندۈزگە ئۇلاپ،  مېنۇت، سېكىنۇت ۋاقتىنى قولدىن بەرمەي ۋەتىنىمىزنىڭ ھەرقايسى جايلىرىدىن كەلگەن تالىبۇلئىلمىلەرنى تەربىيەلەش بىلەن بىرگە ۋەتىنىمىزنىڭ ھەرقايسى جايلىرىدا تەبلىغ ۋە تەشۋىقات ئىشلىرىنى ئېلىپ بېرىپ، ۋەتىنىمىزنىڭ يىگىرمىنچى  ئەسىرنىڭ 80 - يىللىرىدىكى مىللى ۋە دىنى جەھەتلەردىكى ئويغىنىش ۋە گۈللىنىش مەنزىرىسىنى بارلىققا كەلتۈرگەن.

بۇ جەرياندا ئابدۇقەييۇم ھاجىم  دادىسى ئۇستاز  ئابدۇلھەكىم مەخسۇم ھاجىمنى ماددى ۋە مەنىۋى جەھەتلەردىن قوللاپ، ئائىلىنىڭ ئىقتىسادى يۈكىنى ئۆز ئۈستىگە ئېلىپ،  ۋەتەن، مىللەت ۋە دىن يولىدا  خىزمەت قىلىش شارائىتىنى ئىزچىل يارىتىپ كەلگەن.

ئابدۇقەييۇم ھاجىم دادىسىدەك كېچىك پىئىل، خۇشخۇي، چىقىشقاق، كەمتەر، ياردەم پەرۋەر ، ۋەتەن سۆيەر ئۆلىما، جامائەت ئەربابى ئىدى.

ئاللاھ مەرھۇمنىڭ شاھادىتىنى قوبۇل قىلسۇن، ياتقان جايىنى جەننەتۇل فىردەۋستە قىلسۇن.  ئامىن!
 
2020- يىلى 9- ئاينىڭ 30 - كۈنى

http://turkistantimes.com/uy/news-13662.html

خەۋەرلەر

باشقا خىزمەتلەر